శ్రీనివాసుని సంకీర్తనలు

కీర్తన 165
-----
నడిరేయిన నాస్వామి నడయాడి
నళినిని చేరి నగవులు చిందించి

నలిమేల వడిలో నవమోహనాంగుడై
నవరస శృంగారకేళీ నాట్యమాడు వేళ

వెండి వెన్నెల పరిచినట్లు
వేయి కలువలు విచ్చినట్లు

కొండ గాలి విసిరినట్లు
కన్నె కొంగు ముసిరినట్లు

కొండలు కళకళ లాడే
కొలను గలగల లాడే

కోయిల కిలకిల లాడే
గువ్వలు గుసగుస లాడే

సన్నజాజి మొగ్గలు సరసాలాడే
సంపెంగ పూలు సింధూరమాయె
చందమామ మబ్బు చాటు దాగే

జామురాతిరి జాబిలమ్మ జోలపాడే
తెల్లారినా కోడి కూయక నిద్దురోయే
తిరుమలేశునికి సుప్రభాత వేళాయె
చూచి చెలికత్తెలు పకపక నవ్వులాయె